اسلام آباد۔12جولائی (اے پی پی) سپریم کورٹ مخصوص نشستاں بارے کیس اچ الیکشن کمیشن اتے پشاور ہائیکورٹ دے فیصلے کوں کالعدم قرار ݙیندیں ہوئیں آکھیا جو پی ٹی آئی مخصوص نشستاں دی حقدار اے۔ سپریم کورٹ آف پاکستان دے چیف جسٹس قاضی فائز عیسیٰ دی سربراہی اچ 13 رکنی بینچ سنی اتحاد کونسل دی مخصوص نشستاں بارے کیس دا فیصلہ محفوظ کیتا ہئی جئیں اچ چیف جسٹس قاضی فائز عیسیٰ ،جسٹس منیب اختر، جسٹس منصور علی شاہ، جسٹس اطہر من اللہ، جسٹس عائشہ ملک، جسٹس شاہد وحید، جسٹس اظہر حسن رضوی، جسٹس یحیٰ آفریدی، جسٹس جمال مندوخیل، جسٹس محمد علی مظہر، جسٹس عرفان سعادت، جسٹس نعیم افغان اتے جسٹس امین الدین شامل ہن۔چیف جسٹس آکھیا جو سنی اتحاد کونسل دی درخواست تے فیصلہ پنڄ دے مقابلے اچ 8 دی اکثریت دا اے۔ فیصلہ جسٹس منصور علی شاہ لکھیے۔ سپریم کورٹ دے کمرہ نمبر ہک اچ الیکشن کمیشن دے وکیل سکندر بشیر ، اٹارنی جنرل منصور اعوان اتے پی ٹی آئی رہنماواں دی موجودگی اچ فیصلہ سݨایا ڳئیا۔ جسٹس منصور علی شاہ فیصلہ سݨیندیں ہوئیں سنی اتحاد کونسل دی مخصوص نشستاں بارے الیکشن کمیشن اتے پشاور ہائیکورٹ دے فیصلیاں کوں کالعدم قرار ݙتا اتے آکھیا جو الیکشن کمیشن دا فیصلہ آئین دے خلاف اے۔ انتخابی نشان نہ ملݨ کہیں سیاسی جماعت کوں انتخابات دا حصہ ڳھنݨ دے قانونی اتے آئینی حق کوں متاثر نی کریندا۔ پاکستان تحریک انصاف ہک سیاسی جماعت ہئی اتے ھے۔ سپریم کورٹ تریمتیں اتے اقلیتاں دی مخصوص نشستاں پی ٹی آئی کوں ݙیوݨ دا حکم ݙیندیں ہوئیں آکھیا جو پی ٹی آئی مخصوص نشستاں ڳھنݨ دی حقدار اے۔ پی ٹی آئی ایں فیصلے دے 15 ݙینھ اچ آپݨے امیدواراں دے ناں دی فہرست ݙیوے۔ سپریم کورٹ دے فیصلے دا اطلاق قومی تے صوبائی اسمبلیاں تے ہوسی۔
