کراچی ۔19جنوری (اے پی پی):وفاقی وزیر مذہبی امور انیق احمد آکھیے دین اچ ݙسائیاں ڳئیاں ذمے واریاں تے عمل کرتے اساں معاشرے کوں مثالی بݨا سڳدوں۔ اے ڳالھ انہاں داؤد یونیورسٹی کراچی اچ اپݨی زیر صدارت بین المذاہب ہم آہنگی سیمینار توں خطاب اچ آکھی اے ۔ سیمینار اچ کراچی اتے کوئٹہ دے بشپ فیڈرک جان، سابق رکن قومی اقلیتی کمیشن ڈاکٹر جے پال چھابڑیا، ڈاکٹر محسن نقوی، ڈین غزلی یونیورسٹی مفتی ارشاد احمد اعجاز، سردار رمیش سنگھ اتے وائس چانسلر داؤد یونیورسٹی ڈاکٹر سمرین حسین فکر انگیز ڳالھ مہاڑ کیتی ۔ انیق احمد مزید آکھیے اساں انساناں دا شرف اے جو اللہ اساکوں اشرف المخلوقات بݨائے۔ اساں اللہ کوں اتھاں نظر آسوں جتھاں اللہ اساکوں ݙیکھݨ چاہندے ۔ انہاں طلباء کوں آکھیے اساکوں اختلاف رائے کوں ذاتی مخالفت بݨݨ توں روکݨا ہوسی ۔ جے اللہ چاہندا تاں سارے انساناں کوں ھک عقیدے تے رکھیندا ۔ اساکوں چاہیدے جو دنیا توں ونڄݨ توں پہلے انہاں دے جمال اچ ودھارا کروں ۔ بشپ فیڈرک جان آکھیے معاشرے دا تعلیم یافتہ طبقہ ہم آہنگی دے ودھارے اچ کردار نبھاوے اساکوں بین المذاہب ہم آہنگی کوں ضیان پڄاوݨ آلے عناصر دی سنڄاݨ کرݨی ہوسی ۔
