اسلام آباد۔30مارچ(اے پی پی):وزیر دفاع خواجہ محمد آصف آکھیے عدالت عظمی اچ اختلاف رائے چنڳاں شگون کائنی ، جنہاں دے ہتھ اچ ترازو اے او انصاف دا پلڑا برابر رکھن ۔ او خمیس کوں سپریم کورٹ دے ٻاہروں میڈیا نال ڳالھ مہاڑ کریندے پئے ہن ۔ وزیر دفاع خواجہ آصف آکھیے تاریخ دے جیڑھے موڑ تے عدالت عظمیٰ کھڑی اے اتھاں انہاں دا کردار تاریخ ساز ہوسی، او انصاف دے پلڑے برابر رکھن، جݙاں شدید اختلاف رائے اتھاں نظر آوݨ شروع تھی ویسی تاں اے چنڳاں شگون کائنی ۔ آئین انہاں تے اے وی فرض لڳدے جو پلڑے برابر رکھن۔ انہاں آکھیے عدلیہ اپݨے طرز عمل اتے فیصلیں توں سنڄاݨی ویندی اے ، سیاست سیاستداناں تئیں رہݨ ݙیون ، سیاست انہاں اداریں اچ نہ داخل تھیوݨ ݙیون جنہاں دے ہتھ اچ ترازو اے ۔انہاں آکھیے ایں ویلھے ملک اتھاں کھڑے جتھاں ایشوز دی بھرمار اے، ایجھے اچ سودے بازی دے حامل مذاکرات دا کوئی فیدہ کائنی ،انہاں آکھیے میں حالی وی سݨیے جو پنجاب اتے کے پی کے اچ انتخابات دے حوالے نال سماعت کرݨ آلا بینچ ترٹ ڳئے ، بینچ دا ترٹݨ نشاندہی کریندے جو سارا ٹھیک کائنی ، ایں موقع تے ایجھے اقدامات دی لوڑھ اے جو سپریم کورٹ متحد نظر آوے۔
